حياة الرسول صلى الله علية وسلم الحلقة الثانية (2)

Snoop dogg

حياة الرسول صلى الله علية وسلم الحلقة الثانية (2)

يلا صلو على النبى :)

حليمه المره اللى فاتت كانت حزينة اوى لأن محمد صلى الله علية وسلم اتفطم وعدت السنتين و لازم ترجعه لأهله فى مكه كانت حليمه مهمومه أوي من فراقه وراحت ترجعه لامه آمنة.

و فضلت حليمه تقنع آمنه لحد ما وافقت و أقتنعت أن مكة لسه فيها وباء وفعلا وافقت انها تسيب محمد صلى الله علية وسلم  لحليمه
وبتقول حليمه:- فرحت أوي وحضنته ورجعت بيه لبنى سعد ومكنش حد فرحان فى الدنيا قدى أنا و زوجى .

ومرت أيام او شهور و راح محمد عليه الصلاه والسلام لحليمه يستاذن فى الخروج للعب؟ فوافقت وخرج يلعب ومعاه اخوه من الرضاعه
و محمد صلى الله علية وسلم بيلعب مع أخوه صرخ أخوه جااامد أوى وجرى وراح لأمه حليمه وقال: يا أمى ألحقى محمد وبسرعة جرى على أمه وقال لها : محمد أتقتل.. طب ليه ..ايه اللى حصل؟

"حادثه شق الصدر"

اصل محمد صلى الله علية وسلم  لما خرج مع أخوه من الرضاعه  عشان يلعبوا فجاءة جاء جبريل (عليه السلام )

وفتح صدره و طلع قلبه وغسله فى طبق كبير من ذهب بماء ثلج و برد.. وبعدين طلع حاجتين صغيرين من قلبه لونهم أسود و رماها وقال :
هذا حظ الشيطان منك وبعدين رجع قلبه مكانه...وقفل الصدر .

على فكره النبى صلى الله علية وسلم  لحد ما مات فضلت الخياطه معلمه فى جسمه الشريف  وكأنها عمليه قلب مفتوح عملتها الملايكه.

طب ليه حصلت حادثه شق الصدر؟

 الله عز وجل قال: "إنَّا سَنُلْقِي عَلَيْكَ قَوْلًا ثَقِيلًا."والنبى صلى الله علية وسلم بشر وأى قلب بشرى طبيعى مش ممكن يقدر يتحمل القرآن ..كلام الله..ينزل عليه ..قال تعالى :-

" لَوْ أَنزَلْنَا هَٰذَا الْقُرْآنَ عَلَىٰ جَبَلٍ لَّرَأَيْتَهُ خَاشِعًا مُّتَصَدِّعًا مِّنْ خَشْيَةِ اللَّهِ وَتِلْكَ الْأَمْثَالُ نَضْرِبُهَا لِلنَّاسِ لَعَلَّهُمْ يَتَفَكَّرُونَ"

عشان كده كان لازم القلب ده يتعالج معالجه إلهيه عشان يقدر يتحمل الوحى اللى هينزل عليه بعد 38 سنه ..فكان لازم عنايه إلهيه ..
 طب النبى صلى الله علية وسلم  ازاى مامتش ؟ لأن دى كانت معجزه والله على كل شئ قدير

ونكمل كلامنا بعد ما خلصت حادثه شق صدر رسول الله صلى الله علية وسلم 
 كل ده حصل وكان مين واقف عمال يتفرج ؟ اخوه .. فأول ما مشيوا صرخ جامد وقال يا أمى إلحقى .. قتل أخى.. قتل أخى القرشى..
بتقول حليمه فبسرعه جريت و ورايا زوجى.. فلما وصلنا لاقناه صل الله عليه و سلم  واقف و وشه أصفر اوى ..

وبدأ يحكيلها اللى حصل..  فجوزها راح قايلها : يا حليمه خديه و رجعيه لأهله قبل ما يحصله حاجه وحشه اكبر من كده .

بتقول حليمه شيلته ورجعت للزعل والحزن تانى .. و خدته وفضلت أعيط لحد ما وصلنا لمكه .. بحبه.. ومش عايزه أسيبه..

وفعلا خدت آمنه النبىصلى الله علية وسلم من حليمه .. وبتقول حليمه رجعت لبنى سعد وفضلت أعيط و أقول يارب أجمعنى بيه يوم من الأيام يارب.. اصلها كانت بتحب محمد صلى الله علية وسلم أوى

دلوقتى الرسول صلى الله علية وسلم  رجع بيته معاه أمه آمنه والداده بتاعته أم أيمن.. وكبر النبى صلى الله علية وسلم لحد ما بقه عند  6 سنين فمامته قالتله يا محمد أنت كبرت يلا بينا نروح نزور أخوالك فى يثرب "هتتسمى المدينه بعد كده" عشان تعرفهم وأخوال النبى صلى الله علية وسلم كانوا فى منطقه عند بنى النجار..وقالت يلا نزورهم و وأحنا راجعين نعدى كمان على قبر أبوك عبد الله ونزوره ..

وفعلا راحوا يزوروهم و وهمه راجعين عدوا على قبر أبوه عبد الله بن عبد المطلب وقفوا عند القبر وتبكى آمنه ويبكى محمد عليه الصلاه والسلام .. والعلماء قالوا ان أعلى درجات اليتم هوه انك تفقد ابوك من قبل حتى ما تشوفه لانك عمرك ما شفت يعنى إيه أب وعمرك ما جربت تنطق الكلمه الحلوه دى :').. فكان الحبيب صلى الله عليه وسلم يتمه من أعلى درجات اليتم..

وفى طريق رجوعهم لمكه..فى نص الطريق عند منطقه اسمها الأبواء ..
 تحصل حاجه شديده أوى وصعبه  أم النبى صلى الله علية وسلم  تعبت وبدأت تحس أنها مش قادره تتنفس والألم بيزيد وتبدأ تقع على الأرض.ويبدأ النبى صلى الله علية وسلم  يحضنها ويطبطب عليها بإيده الشريفه صلى الله عليه وسلم محمد خايف أوى بدأ يعيط مش عارف إيه اللى بيحصل لأمه آمنه تحتضر وأم أيمن واقفه مش عارفه تعمل إيه وبعد دقايق وقف ألم آمنه ..آمنه ماتت 

بقى يتيم الأب والأم .. تدفن آمنه...

أتولدت يا رسول الله ومشفتش أبوك ومعرفتش معنى وإحساس كلمه أب .. وأمك تموت و عندك ست سنين.. هيفضل المنظر قدام عينيك؟! هتفضل فاكره طول عمرك؟!.. أى طفل لو مر بظروف زى دى ممكن يطلع طفل معقد.. حقود.. عايز ينتقم من الدنيا إلا النبى صلى الله عليه و سلم إزداد حنان فوق حنانه وطيبه وعطف..وهنشوف ده طول ما أحنا بنحكى سيرته سوا مواقف كتيره مليانه رحمه وإنسانيه..

محمدصلى الله علية وسلم  دلوقتى مع أم أيمن يتيم الأب وكمان الأم.. مين هيهتم بيه بعد كده؟ مين هيبقى ولى أمره؟

هنعرف سوا تابع .......