الي شوفت فيه العجب:
ساعات الواحد بيتعرض لمواقف و بيشوف حاجات ملهاش اي تفسير منطقي وحتي لو حاولت تلاقيلها تفسير مش بتوصل لحل و بتتعب من التفكير حصل معايا موقف من فتره كنت مسافر علي طريق العلمين وده الطريق الي بيوصلك للساحل الشمالي ومرسي مطروح انا سافرت علي الطريق ده اكتر من مره وعمري ما شوفت عليه حاجه غريبه او اي موقف غير طبيعي حصلي عليه ماعادا اليوم ده.
الي شوفت فيه العجب:
اليوم ده انا فاكره كان يوم اتنين و مديري في الشغل كان معاه ورق مهم جدا وهوه كان مسافر وقاعد في قريه في الساحل الشمالي وكان لازم اخد الورق منه في نفس اليوم لاننا محتاجينه تاني يوم الصبح ضروري.كلمني و طلب مني اجيله اخد الورق وارجع تاني المشوار طبعا رخم وصعب اخده صد رد فقررت اخد واحد زميلي في الشغل نروح سوا علي اساس اسوق العربيه واحنا رايحين وهوه يسوق واحنا راجعين.
طبعا الكلام ده كان علي الساعه 5 المغرب عقبال مظبطنا نفسنا وسافرنا كانت الساعه دخلت علي 10 بليل تقريبا ووصلنا علي اول طريق العلميين علي الساعه 12 في نص الليل.
الدنيا ضلمه كحل ومفيش اي اضائه علي الطريق والطريق اصلا شكله يخوف والمصيبه ان كشافات العربيه عندي ضعيفه فضلت ماشي مركز فى الطريق كويس لحد ما صاحبي فتح موضوع وقالي.
انت عارف سبب تسميه طريق العلمين ايه قولتله لا بصراحه معرفش قالي سبب تسميته نسبه لمقابر العلمين وطبعا مقابر العلمين دي الي مدفون فيها جثث الجنود الالمان والانجليز الي ماتو في الحرب العالميه التانيه في المعركه الي كانت دايره هنا وقتها قولتله اول مره اعرف المعلومه دي بصراحه.
رد عليا وقالي امال لو عرفت اللي بيحصل هنا بقي هتعمل ايه:
قولتله ايه الي بيحصل هنا وطي صوته وقال فيه ناس كتير وهيه مسافره علي الطريق ده شافت عفاريت لجثث الجنود الي ماتوا هنا تظهر وتختفي وحاجات تانيه غريبه قولتله حاجات زي ايه.
قالي مره واحد قريبي كان مسافر وشاف جنبه جندي شعره اصفر وعنيه خضره ولابس لبس الجيوش بتاع زمان وجسمه كله غرقان دم وبيجري بنفس سرعه العربيه جنبه في الصحرا قولتله ياسلام انت مصدق نفسك قالي والله ده حلفلي واقسم بالله انه شاف كدا قولتله كل شئ جايز ربنا يحفظنا فكك بقي من ام السيره المنيله دي.
سكتنا ومحدش اتكلم ومفيش بعديها بعشر دقايق لقيت العربيه بتحدف مني وسمعت صوت غريب هديت بسرعه ووقفت بالعربيه علي جنب وزميلي قالي ايه الي حصل في ايه قولتله مش عارف ياعم الفقري اصبر اما انزل اشوف.
نزلت ابص ع العربيه وزي ما توقعت للاسف لقيت فرده الكاوتش الي ورا مخرومه وعلي الارض جريت بسرعه على الشنطه وفتحت العربيه ابص لقيت الاستبن سليم قولت الحمد لله وقولت لزميلي تعالي ياعم ساعدني نغير الكاوتش في ليلتك الي مش فايته دي كنا واقفين جنب شجره كبيره ولسه مخلصتش كلامي لقينا راجل عجوز واسمر وشكله يخوف طلعلنا فجأه من ورا الشجره.
انا وزميلي اتخضينا لقيناه بيقولنا انتو واقفين بتعملو ايه هنا قولتله ايه ياحاج رعبتنا حرام عليك احنا كنا مسافرين والكاوتش اتخرم نزلنا نغيره و نكمل طريقنا رد وقال طيب لو احتاجتوا حاجه انا قاعد في البيت الي ورا الشجره هنا وشاورلنا على البيت بنبص لقينا بيت صغير دور واحد جوه في الصحرا.
قولتله ربنا يكرمك ياحاج وسابنا ومشي غيرنا الكاوتش بسرعه وركبنا واتحركنا وقولت لزميلي انا قلبي كان هيقف اول ما الراجل ده طلع فجأه قالي وانا كمان.
قولتله مهوه كله بسبب قصص العفاريت والعلمين الي عمال تحكيها من ساعه متحركنا قالي خلاص ياعم حصل خير فضلنا ماشيين بالعربيه وبعد 30 كيلو تقريبا لقيت مؤشر الحراره بتاع العربيه ارتفع فجأه بدون سبب.
قولت ايه الشغلانه السودا دي بطلت العربيه وركنت ونزلت فتحت الكابوت لقيت الميه ناقصه في العربيه استنيت العربيه تهدي شويه عشان اقدر ازودها ميه و زميلي قالي ايه ياعم العربيه بتاعتك الي كل شويه تعطل دي قولتله عمرها ماعملت معايا كدا واضح ان في حد فقري.
وبصتله وانا نفسي اخبطه بحجر علي راسه وادفنه في الصحرا دي واخلص من رخامته واحنا واقفين مستنيين لقيت صاحبي بيقولي الحق الراجل الي قبلناه من شويه اهوه واقف قولتله واقف فين يابني وببص لقينا الراجل الناحيه التانيه من الطريق جالي ذهول وقولتله ايه ياعم ده احنا سايبين الراجل ورا ايه الي جابه هنا.
قعدنا ننده عليه ياحاج ياحاج وهوه واقف الناحيه التانيه ثابت مبيتحركش زميلي قالي يالا ياعم انا خايف الراجل ده شكله عفريت قولتله ياعم اسكت بقي مترعبنيش انا علي اخري اصلا زودت ميه ودورت العربيه واتحركنا بسرعه.
عمال ادعي ربنا ميحصلش حاجه بقي ونخلص من الشغلانه السودا دي فجأه واحنا ماشيين لقيت نفس الراجل واقف علي جنب الطريق وعمال يشاور وزميلي اتفزع وقالي اهوه اهوه الراجل واقف بيشاور ده عفريت والله عفريت جبت اخر دواسه البنزين لحد ما عدينا من جنب الراجل.
وزميلي بص ورا لقي الراجل اختفي قعدنا مرعوبين ومحدش بيتنفس من الرعب وانا جايب اخر العربيه وشغلنا قرأن لحد لما اخيرا خلصنا الطريق ووصلنا للقريه الي المدير قاعد فيها وكلمناه ودخلنا قابلنا كان شكلنا كان باين عليه الاجهاد والتعب والخوف.
المدير اول ما شافنا قالنا مالكم عاملين كدا ليه حصل حاجه وله ايه قولتله ابدا بس العربيه عطلت مننا واحنا جايين بس جت بسيطه الحمد لله المهم واحنا واقفين بنتكلم معاه هوه عنده كلب صغير مربيه فجأه الكلب جه من ورا زميلي وراح شده من رجله اكنه بيلعب معاه صاحبي فجأه صرخ و نط من على الارض وقف فوق الكنبه وانا اتفزعت من صرخته وروحت راجع لورا فجأه المدير قالنا مالك يابني انت وهوه في ايه ده الكلب بيلعب معاكم انتوا شكلكم مش طبيعي.
قولتله والله احنا حصلنا موقف مش تمام وحكيتله القصه الي حصلت معانا بالظبط قعد يضحك ويقولنا انتوا شاربين حاجه وله ايه قولتله والله حصل معانا كدا فعلاقال طيب خلاص خليكم قاعدين معايا لحد النهار ما يطلع ونفطر سوا واتحركوا بلاش تمشوا دلوقتي بدل مالراجل يكون مستنيكم وقعد يضحك.
طبعا انا حمدت ربنا انا كنت خايف ارجع تاني من نفس الطريق والدنيا ضالمه كحل كدا وفضلنا مستنيين معاه لحد اول ما الشمس طلعت وفعلا اتحركنا انا وزميلي بس المرادي زميلي الي كان سايق والحمد لله خدنا الطريق كله بدون مشاكل بس الغريب اول ما قربنا من المكان الي قابلنا فيه الراجل اول مره كنت معلم المكان بالشجره الكبيره لقينا الشجره.
بس ملقناش البيت الي الراجل شاورلنا عليه محاولناش حتي نفكر او نسأل نفسنا وفضلنا مكملين طريقنا لحد لما الحمد لله وصلنا بالسلامه تفتكروا الي شوفناه ده كان بجد وله خيالات لاني لحد دلوقتي فعلا مش عارف.
.jpeg)
